وزیر خارجہ شاہ محمود قریشی نا ای سی او نا سیکرٹری جنرل ڈاکٹر ہادی سلیمان تون اوڑدہی ٹی گپ و تران

اسلام آباد۔ 14مارچ(اے پی پی) وزیر خارجہ شاہ محمود قریشی ڈیہہ نا شونداری و شونہالی ٹی اقتصادی کمکار تنظیم (ای سی او ) نا کڑد انا ستاءِ کرسا پارے کہ حکومت پاکستان بانی باسک مننگ نا خاطر ای سی او ءِ پورو کمک فراوان کیک۔ داہیت ءِ او سیکرٹری جنرل ای سی او ڈاکٹر ہادی سلیمان تون گپ و تران کرسا پارے ہرا پنچ شنبے نادے آ داڑے وزارت خارجہ ٹی اوڑتون اوڑدہی کرے۔ سیکرٹری جنرل وزیر خارجہ ءِ تنظیم نا مسخت آتیان معلومدار کرسا پارے کہ تنظیم ڈیہہ ٹی اقتصادی سرجزآتا مون آ دننگ کن کوشست کننگ ءِ۔ اوپارے کہ اقتصادی کمکار تنظیم چندی ملک آتا نیام اٹ واپاری رابطہ غاتا مون آ دننگ کن متاماری کننگ ءِ۔ وزیر خارجہ ڈیہہ ٹی اقتصادی کمکار تنظیم نا کڑدانا ستاءِ کرسا پارے کہ حکومت پاکستان فاؤنڈنگ باسک مننگ نا خاطر ، اکنامک آرگنائزیشن ءِ پورو کمک فراوان کیک۔ اوپارے کہ پاکستان معاشی سوگوی نا ایجنڈا غا عمل کننگ ءِ و نن دا چرجوئی ٹی پبی وڑاٹ معاشی سفارت کاری نا بناءِ کرینن۔ وزیر خارجہ اومیت ظاہر کرے کہ تنظیم ہادی سلیمان نا سرکڑدہ ہی ٹی تینا مسخت آتے دوئی کیک۔ اوپارے کہ پاکستان ای سی او بنداوی باسک و اہم انگا پارٹنر ءِ۔ علاقائی شونداری ٹی ای سی او پاکستان نا کڑد ءِ قدر انا نظر اٹ ہرک۔ سیکرٹری جنرل ای سی او وزیر خارجہ مخدوم شاہ محمود قریشی ءِ تنظیم نا کنڈآن تین پہ تینی است خواہی نا معاملہ غاتے ٹی پبی کمکاری نا یخین دہانی کرفے۔