بنجائی وزیر اطلاعات و نشریات چوہدری فواد حسین نا ڈسٹرکٹ بار ایسوسی ایشن اسلام آباد آن تران

اسلام آباد ۔ 14مارچ(اے پی پی) بنجائی وزیر اطلاعات و نشریات چوہدری فواد حسین عدالتی اصلاحات آتے المی گوندسا پارینے کہ ہراوخت اسکان لس بندغ ءِ دا احساس مفک کہ داملک اٹی ہزگار بندغ و لس بندغ کن اسہ ہی کانود اسے ہمووخت اسکان پاکستان مون آ ہِننگ کپک، حکومت ، عدلیہ و وکیل آک اواری اٹ عدالتی اصلاحات کننگ کیرہ، عدالتی اصلاحات آتیان قومی معیشت اٹی ہم گچینی بریک، ہائی کورٹ نا جج آتا تعیناتی نا وڑوڈول بایدے پیدوار مرے، سپریم کورٹ اٹی اسلام آباد ضلعی عدالت آتا ججز روٹیشن بارواٹ فیصلہ غا من و عن عمل کننگک، مسکوہی وزیراعظم محمد نواز شریف و پاکستان پیپلزپارٹی نا راہشون تا برخلاف ننا دوراقتدار اٹی اسہ مقدمہ اس ہم نوشتہ کننگتنے، ہر ضلع ٹی ہتک عزت نا مقدمہ غاتا سماعت کن اِراجج مقرر کننگ کن سپریم کورٹ و ہائی کورٹ آتے چھٹی نوشتہ کینہ۔ او پنچ شنبے نادے آ ڈسٹرکٹ بار ایسوسی ایشن اسلام آباد اٹی تران کریکہ۔ بنجائی وزیر اطلاعات و نشریات چوہدری فواد حسین پارے کہ دہشت گردی نا برخلاف جنگ اٹی مچ آ ملک انا وکیل آک ہم دترنا نذرانہ تسنو، اینو ہراہال اٹی نن تولوک اُن دا 2014ء ٹی شہید مروک آ وکیل آتا پن اتون گنڈوک ءِ، پاکستان نا ہر تپہ دہشت گردی نا برخلاف تینا دتر ءِ تسنو۔ اوپارے کہ اسلام آباد بار ایسوسی ایشن اٹی پنچ ہزار و ہائی کورٹ بار اٹی پونے چار ہزار وکیل تینا کسبی خذمت آتے سرانجام تننگ ءُ۔ اوپارے کہ داوخت آ پاکستان نا حالیت آک بھاز جوان مننگ ءُ ، ملک اٹی گوازی تا پڑ آک آباد مننگ ءُ، دا گچین مروک آ حالیت آتے ٹی وکیل آتا قربانیک ہم اوار اریر۔ بنجائی وزیر چوہدری فواد حسین پارے کہ ای بطور وکیل ڈسٹرکٹ بار اسلام آباد اٹی پریکٹس کرسا کرینٹ، کنے خوشی ءِ کہ اینو ہم ای تینا وکیل برادری تتون گنڈوک اُٹ۔ اوپارے کہ اسلام آباد بار انا باسک آک ہم بھلا بھلا عہدہ غاتیا رہینگانو ولے بدبختی اٹ اوفک تینا تینا اُراتے تو بھاز بھلن کرینو ولے بار انا حالیت آ چکار کتنو۔ بنجائی وزیر اطلاعات و نشریات پارے کہ اسلام آباد ہائی کورٹ پوسکن آ ماڑی ٹی منتقل مرے تو ولدا ضلعی عدالت آتے ہمونگیا منتقل بایدے مروئی مرے،اوپارے کہ ہراتم وزیراعظم داہیت ءِ کیک کہ داخہ بھلو وزیراعظم ہاؤس اس 11 سد کنال آ جوڑ کرینو تو قومی خزانہ ءِ بے دڑدی اٹ پلوک آک داپارہ کہ دانا گرج ءِ۔ اوپارے کہ چیف کمشنر اسلام آباد و چیئرمین سی ڈی اے تون ہیت کننگک کہ او ضلعی عدالت آتا دورہ ءِ کرسا وکیل آتے ویل آتے بنے و اوفتا دمدستی ایسری ءِ المی جوڑ کننگے۔ اوپارے کہ اگہ پاکستان اٹی ننے لس بندغ ءِ فائدہ تروئی ءِ تو عدالتی نظام اٹی اصلاح نا گرج ءِ، حکومت ، عدلیہ و وکیل آک اواری اٹ عدالتی اصلاحات کننگ کیرہ۔ اوپارے کہ اسلام آباد نا پوسکن آ ماسٹر پلان جوڑ مننگ ءِ ہراٹی وزیراعظم عمران خان بڑز و بھلن ماڑی تا جوڑ کننگ نا موکل تسنے۔ اوپارے کہ نن کوشست کینہ کہ غٹ بار ایسوسی ایشن آتے تون اوار کان۔ اوپارے کہ اسلام آباد اٹی ججز روٹیشن نا ویل چلینگ انگ ءِ و او معاملہ سپریم کورٹ اٹی ءِ سپریم کورٹ نا فیصلہ ٹی من و عن عمل کننگک۔ اوپارے کہ سُچا ہیت تو دادے کہ ہچ ءُ بریبری اس اف ہزگار بندغ کن جیل فائیو اسٹار ہوٹل اس جوڑ مسنے و نیزگار بندغ کن اُراجیل اس جوڑ مسنے۔ اوپارے کہ ای سپریم کورٹ و ہائی کورٹ آتا جج آتے چھٹی اس نوشتہ کننگ اُٹ کہ ہر ضلع ٹی ہتک عزت نا مقدمہ غاتا سماعت کن اِراجج مقرر کننگے۔ اوپارے کہ حکومت نا بار ایسوسی ایشن تون خڑکی رابطہ المی ءِ۔ چوہدری فواد حسین پارے کہ وزیراعظم عمران خان نا است لس بندغ کن دھڑکک او پاکستان کن گڑاس کننگ خواہک اونا نیت و کوشست آ شک کننگ مفک۔ بنجائی وزیر اطلاعات و نشریات پارے کہ وزیراعظم عمران خان نا سرکڑدہ ہی ٹی بھلو تنکی سے آن پیش تمانن، داسہ ننے معاشی تنکی آن پیش تموئی ءِ۔ اوپارے کہ پی ٹی آئی نا سپورٹر مڈل کلاس نا بندغ آک ءُ نن وڈی خوری ءِ توننگ آ ہچ ءُ سمجھوتہ اس کننگ کپنہ۔ چوہدری فواد حسین پارے کہ داوخت آ پاکستان نا ہرا حالیت آک ءُ ننے عمران خان آن جوان ءُ بندغ پین ہچ کس ملنگ کپک۔ اوپارے کہ مخلوق نظام نا بدلی کن ننے وونٹ تسنو، حکومت ہچ ءُ سمجھوتہ اس کپک۔ اوپارے کہ بلاول بھٹو جیل بھرو تحریک نا ہیت ءِ کرینے لگک کہ سندھ اٹی گرج اف ہموجاگہ نا جیل آک تینٹ ہی پُر مریرہ و ایلو صوبہ غاتا پیپلزپارٹی اسہ بیرک اٹی بند مریک۔ چوہدری فواد حسین پارے کہ انتقامی سیاست نا ہیت ءِ کروک آک بیرہ دوبہ خلنگ ءُ ن لیگ و پیپلزپارٹی اسہ ایلو آ مقدمہ جوڑ کریر نئے نن جج اس بھرتی کرینن و نئے مقدمہ اس جوڑ کرینن۔ اوپارے کہ ہفت تُو اٹی حکومت نا ہچ ءُ سکینڈل اس مون آ بتنے خزانہ ہم حیران مریک کہ ہفت تُو اٹی اودے ہچ کس لٹ و پل کتنے۔