وزیراعظم عمران خان سے شنبے نادے آ تھل ایکسپریس نا بناءِ کیک

ملتان۔ 11 فروری (اے پی پی) وزیراعظم عمران خان نا پرمان تیا ملتان و راولپنڈی نا نیام اٹ بحال کروک آ تھل ایکسپریس نا بنا(پگہ) سے شنبے نادے آ مریک، وزیراعظم عمران خان سہب انا ہفت بجہ غا راولپنڈی ریلوے اسٹیشن آ تھل ایکسپریس نا بناءِ کیک۔ ملتان آن ہم سہب انا ہفت بجہ غا ٹرین راولپنڈی کن رادہ مریک۔ ٹرین انا روانگی نا وخت آ راولپنڈی ٹی مروک آ تھل ایکسپریس نا بنائی دود ملتان ریلوے اسٹیشن آ براہ راست نشان تننگک۔ ٹرین انا روانگی نا تیاریک پورو مسنو۔ داوخت آ ملتان ریلوے اسٹیشن ءِ زیبائی اٹ بیرفنگانے۔ ملتان آن راولپنڈی اسکان ہرا ریلوے اسٹیشن آتیا دا ٹرین نا اسٹاپ ءِ ہموڑے ہم بیرف نا بست و بند کننگانے۔ چندی بینرز ہم خلنگانے ہرافتیا وزیراعظم عمران خان و بنجائی وزیر شیخ رشید احمد نا عکس آک خلوک ءُ ۔ بنجائی وزیر ریلوے شیخ رشید احمد ہم ٹرین نا کمک اٹ ملتان آ سرمریک۔ ڈویژنل سپرنٹنڈنٹ ریلوے ملتان ڈویژن امیر محمد داؤد پوتا تینا ڈویژنل آفیسر آتون اوار کندیاں اسٹیشن آ بنجائی وزیر ریلوے شیخ رشید احمد ءِ بخیر کیرہ و اوڑتون اوار ملتان کینٹ اسٹیشن اسکان بریرہ۔ ملتان کینٹ اسٹیشن آ سرمننگ آ ڈپٹی ڈی ایس صائمہ بشیر بنجائی وزیر ءِ بخیر کیک۔