صدر مملکت ڈاکٹر عارف علوی نا سٹیزنز پولیس لیئز ان کمیٹی نا بنجائی رپورٹنگ سیل انا دورہ ٹی گپ و تران

کراچی۔ 11 فروری (اے پی پی) صدر مملکت ڈاکٹر عارف علوی سٹیزنز پولیس لیئز ان کمیٹی (سی پی ایل سی) نا کارکڑدگی نا ستاءِ کرسا پارے کہ دانا دنگ ءِ سندھ انا ایلو ضلع غاتسکان تالان کننگے، کراچی نا غٹ پولیس اسٹیشن تیا سی سی ٹی وی کیمرہ خلنگے، پرامن کراچی آن درملکی زرکاری ودک۔ اوداہیت ءِ دوشنبے نادے آ سٹیزنز پولیس لیئز ان کمیٹی نا مرکزی رپورٹنگ سیل انا دورہ ٹی پارے۔ گورنر سندھ عمران عمران اسماعیل ہم صدر مملکت تون اوار ئس۔ داوخت آ سی پی ایل سی چیف زبیر حبیب صدر مملکت ءِ ادارہ نا کارکڑدگی آ احوال تس۔ ڈاکٹر عارف علوی سی پی ایل سی نا کارکڑدگی نا ستاءِ کرے وپارے کہ سی پی ایل سی نا دنگ ءِ سندھ انا ایلو ضلع غاتسکان تالان کننگے۔ گورنر سندھ عمران اسماعیل ہم سی پی ایل سی نا کارکڑدگی نا ستاءِ کرے۔ گورنر سندھ پارے کہ زالبول ءِ ہراساں کننگ و اسکول و کالج آتیٹی منشیات نا توننگ کن ہم ادارہ کاریم کے۔ اوپارے کہ سائبر کرائم نا بابت ایف آئی اے آن کمک ہلنگے تانکہ دا غاو تا ہم دمدستی تدارک مننگ کے۔ سی پی ایل سی چیف پارے کہ سی پی ایل سی و پولیس نا نیام اٹ گچین ہم گرنچی و بروخت کارروائی تا سوب کراچی ٹی ڈوہ انا کچ اٹی کمتی بسنے۔ کراچی آپریشن آن پد برمتہ برائے تاوان، بھتہ خوری ، گاڈی وموٹرسائیکل آتا دُزی ٹی نمان کمتی بس۔ اوپارے کہ سی پی ایل سی نا پین دفتر حیدر آباد و جامشورو ٹی ملنگ انگ ءِ۔ سی پی ایل سی چیف پارے کہ ایلو ضلع غاتے ٹی ہم زونل دفتر جوڑ مریک۔ زبیر حبیب پارے کہ ادارہ تون ڈیٹاجمع کننگ و رکھ کننگ کن پوسکن ءُ ٹیکنالوجی اس ارے۔