بنجائی وزیر اطلاعات و نشریات چوہدری فواد حسین نا دبئی ٹی ورلڈ گورنمنٹ سمٹ نا وزارتی دیوان آن پد میڈیا تون گپ و تران

دبئی۔ 11 فروری (اے پی پی) بنجائی وزیر اطلاعات ونشریات چوہدری فواد حسین پارینے کہ ٹیکنالوجی بے پناہ فائدہ غاتون پوسکن آ چیلنج آتے ہم ودی کننگ ءِ، دنیا ءِ دا چیلنج آتون مون تننگ کن اسیجا کوشست آتے کاریم اٹ اتوئی مریک و دا چیلنج آتا ایسری کن چندی ورکنگ پڑک آتے جوڑ کروئی مریک ۔ او دبئی ٹی ورلڈ گورنمنٹ سمٹ نا ارٹ میکو دے مصنوعی زہانت نا سرحال آ وزارتی دیوان اٹی بشخ ہلنگ آن پد میڈیا تون گپ و تران کریکہ۔ وزیر اطلاعات و نشریات پارے کہ ورلڈ گورنمنٹ سمٹ اٹی وزیراعظم عمران خان پاکستان نا بابت تینا وژن ءِ تس، اینو نا دیوان اٹی مصنوعی زہانت اٹی مون تروک چیلنج آتیا ہیت مس، داڑے اقوام متحدہ ، او ای سی ڈی، لیبر یونینز تون اوار مچ آ دنیا غان بروک آ چندی پڑک آک تینا پریزنٹیشن تے تسر ، ڈیجیٹل اکانومی ٹی مون تروک چیلنج آتیا ہیت مس۔ بروک آ مرحلہ ٹی بیدس ڈیور گاڈی بننگ والا ءِ ہراڈیورنگ تون وابستہ بندغ آتے کن اسہ چیلنج اس مریک۔ دنیا ٹیکنالوجی نا انقلاب آن گدرینگ انگءِ۔ اوپارے کہ ہراڑے ٹیکنالوجی نا بے پناہ فائدہ ارے ہموڑے چیلنج ہم ساڑی ارے۔ اینو نا دیوان پوسکن آ ٹیکنالوجی ءِ گچین وڑاٹ کاریم اٹ اتنگ آن بابت ئس۔ وزیر اطلاعات پارے کہ دنیا ءِ دا چیلنج آتون مون تننگ کن اسیجا کوشست آتے کاریم اٹ اتوئی مریک و دا چیلنج آتا ایسری کن چندی ورکنگ پڑک جوڑ کروئی مریک۔