وزیراعظم عمران خان نا امریکی اخبار ’’واشنگٹن پوسٹ ‘‘ ءِ انٹرویو

اسلام آباد۔ 07 دسمبر (اے پی پی) وزیراعظم عمران خان پاکستان اٹی مساوات و انصاف پسند راج اسے نا جوڑ کننگ کن تینا عزم انا اعادہ ءِ کرسا پارینے کہ او فلاحی ریاست آ باور کیک، ڈونلڈ ٹرمپ نا ٹویٹ نا ورندی ٹی ٹویٹ ٹویٹر نا جنگ آخا بلکن ریکارڈ نا سہی کننگ اس، پاکستان اٹی طالبان تا اودیم پناہ گاہ اف، اوغانستان اٹی امن کن تینا گچین کوشست ءِ کینہ۔ اوغان ویل انا فوجی ایسری اس اف، کنا داموقف نا سوب آن کنے طالبان خان نا ہم تران ملا۔ خوشی ءِ کہ داسہ غٹ خلقت اوغان ویل انا سیاسی ایسری نا ہیت ءِ کننگ ءُ۔ پاکستانی نقطہ نظر اٹ ای سمجھیوہ کہ امریکہ ءِ اوغانستان آن 1989 ء آمبار جلدبازی اٹ بایدے پیش تموئی مف، امریکہ اسامہ نا بارواٹ پاکستان تون معلومداری بایدے شیئر کروسس، ممبئی جلہو کروک آتے انجام اسکان سرکننگ خوانہ، آئی ایم ایف تون ہم ہیت وگپ کننگ اُن ولے کبینی و بے روزگاری ءِ ودفوک آ شرط آتے امنا کپنہ۔ امریکی اخبار واشنگٹن پورسٹ ءِ انٹرویو ترسا وزیراعظم عمران خان پارے کہ امریکی صدر ڈونلڈ ٹرمپ نا ٹویٹ نا ورندی ٹی اونا ٹویٹ ٹویٹر جنگ اف بلکن ریکارڈ نا سہی کننگ اس۔ ٹوئٹر آ کلہو آتا تبادلہ امریکہ نا کنڈآن اوغان ویل انا فوجی ایسری نا غلط پالیسی تے کن پاکستان ءِ مورد دوبہ دار کننگ نا ورندی ئس، امریکی صدر دوبہ خلککہ کہ پاکستان اٹی طالبان راہشون تا پناہ گاہ ارے۔ وزیراعظم دوٹوک وڑاٹ پارے کہ پاکستان اٹی داوڑنا ہچ ءُ اودیم پناہ گاہ اف۔ وزیراعظم عمران خان پارے کہ ہراتم او اقتدار اٹی بس تو اودے سیکورٹی فورس آتا کنڈان پورو احوال تننگا۔ احوال اٹی کنے پاننگاکہ نن وار وار امریکہ تون پارینن کہ داوڑنا اودیم پناہ گاہ تا پیدواری ءِ کننگے۔ نن اوفتا برخلاف کارروائی کینہ۔