بنجائی وزیر اطلاعات و نشریات چوہدری فواد حسین نا انٹرنیشنل انسٹی ٹیوٹ آف سٹریٹجک سٹڈیز اٹی تران

لندن۔ 06 دسمبر (اے پی پی) بنجائی وزیر اطلاعات و نشریات چوہدری فواد حسین پارینے کہ سی پیک اہم انگا اقتصادی ڈٹ ءِ، یورپی یونین تون اوار ایلو ملک آک دانا اقتصادی وارخواہی تیان فائدہ ہرفنگ کیرہ۔ کرتارپور راہداری نا بناء آن پوسکن ءُ تاریخ اس نوشتہ مس، وزیراعظم عمران خان نا منصب ءِ سنبھالنگ آن پد سعودی عرب و چین نا تعلقداری تے پوسکن ءُ بڑزی اس و ودکی اس ملا۔ پاک امریکہ تعلقداری تے ٹی گچینی بننگ ءِ، تحریک انصاف نا اقتدار اٹی بننگ راج انا متوسط تپہ نا وڈی خوری و ’’سٹیٹس ءِ‘‘ نا برخلاف انقلاب اسے ، اولیکو وار واکدار بندغ آک کانود نا زور ءِ محسوس کننگ ءُ، سول و عسکری ادارہ غاتے ٹی شاندار ہم آہنگی ءِ، او تدوک آ دے داڑے انٹرنیشنل انسٹی ٹیوٹ آف سٹریٹجک سٹڈیز اٹی تران کریکہ۔ بنجائی وزیر اطلاعات و نشریات چوہدری فوادحسین پارے کہ پاکستان اسہ زیباءُ ملک اسے ہرادے دنیا جوان وڑاٹ تتنے، 1980 ء آن تباہ کن حالیت آتا مون تروک ئس ، پین ملک اس داحالیت آتا گواچی مسکہ تو اونا بچنگ و پیش تمنگ مشکل ئس۔ وزیراطلاعات چوہدری فواد حسین پارے کہ پاکستان داغٹ چیلنج آتون مون تس، مسلم ملک آک و مسٹ میکو دنیا ٹی پوسکن ءُ ملک اس جوڑ مرسا مون آ بس۔ پاکستان اٹی غٹ ادارہ غاک فعال ءُ و تینا زمواری تے جوان وڑاٹ پورو کننگ ءُ۔ اوپارے کہ پاکستان اٹی عدلیہ آزاد و متحرک میڈیا ءِ، پاکستان اٹی میڈیا ءِ بے مٹ آجوئی دوئی ءِ۔ اوپارے کہ وزیراعظم عمران خان نا سرکڑدہ ہی ٹی حکومت نا جوڑ کننگ پاکستانی قوم انا سیاسی پختگی نا درشانی ءِ، پاکستان تحریک انصاف نا اقتدار اٹی بننگ راج انا متوسط تپہ نا وڈی خوری و ’’سٹیٹس ءِ‘‘ نا برخلاف انقلاب اسے، کانود شکن و واکدار بندغ آک کانود نا شکنجہ ٹی بسنو، وزیراعظم پاکستان اوغانستان اٹی امن و سوگوی کن گچین سلاہ و سوج پیش کرے، پاکستان تحریک انصاف نا حکومت نا بننگ آن پاکستان و امریکہ نا تعلقداری تے ٹی گچینی بننگ ءِ۔ امریکی صدر نا پاکستان نا وزیراعظم ءِ چھٹی و اوغانستان کن خصوصی نمائندہ زلمے خلیل زاد نا وزیراعظم تون اوڑدہی، تعلقداری تے ٹی گچینی نا شاہدی اسے، وزیراعظم پاکستان اوغانستان اٹی امن و سوگوی کن گچین سلاہ و سوج پیش کرینے۔ اوپارے کہ وزیراعظم عمران خان نا منصب ءِ سنبھالنگ آن پد سعودی عرب و چین اتون تعلقداری تے پوسکن ءُ بڑزی اس و ودکی اس ملانے۔ بنجائی وزیر چوہدری فواد حسین پارے کہ عمران خان نا اولیت الس ءِ نیزگاری آن نجات ترفوئی ءِ، ساڑی حکومت نا پالیسیک ہندا مسخت نا دوئی کننگ کن ءُ۔ اوپارے کہ پاکستان کشمیر نا ویل انا پرامن ایسری آ باور کیک۔ وزیراعظم عمران خان نا سرکڑدہ ہی ٹی پاکستان سہی سمت آ راہی روان ءِ ، وڈی خوری نا چٹفنگ و شفافیت ساڑی حکومت نا نعرہ ءِ، امریکہ تون تعلقداری تے ٹی گچینی بننگ ءِ۔ اوپارے کہ کنا تعلق پوٹھوہار نا علاقہ جہلم آن ءِ، پوٹھوہار نا علاقہ برصغیر اٹی تاریخی اہمیت اس تخک۔ سکندر اعظم و راجہ پورس نا ہندا علاقہ ٹی جنگ مس۔ اوپارے کہ سویلی پنجاب کون آ پدسلوک آ علاقہ غاتا شونداری حکومتی منشور نا اہم ءُ بشخ اسے ءُ ، الس حکومت و سول سوسائٹی تون اوار غٹ ادارہ غاک اسہ پنہ غاٹی ءُ۔ اوپارے کہ حکومت وڈی خوری نا برخلاف جہد ءِ برجاتخک، دہشت گردی نا برخلاف کل قوم یکجاءِ، وڈی خوری نا چٹفنگ و شفافیت ساڑی آ حکومت نا بنداوی نعرہ ءِ۔ وزیر اطلاعات پارے کہ السی است خواہی تا رداٹ کرپشن نا برخلاف گام گیج آتے برجاتخنہ۔ پاکستان کشمیر نا ویل انا پرامن ایسری آ باور کیک۔ اوپارے کہ سی پیک آن ڈیہہ ٹی شونداری و شونہالی بریک، پاکستان بھارت تون اوار غٹ ہمسایہ غاتون گچین تعلقداری خواہک ، امریکہ تون تعلقداری تے ٹی پین گچینی بننگ ءِ۔ چوہدری فواد حسین پارے کہ وزیراعظم عمران خان نا سرکڑدہ ہی ٹی پاکستان سہی سمت آ روان ءِ۔ اوکان پد وزیراطلاعات نا انٹرنیشنل انسٹی ٹیوٹ آف سٹریٹجک سٹڈیز نا بڑزکو عہدیدار آتون اوڑدہی کرے۔ وزیر اطلاعات ءِ انسٹی ٹیوٹ نا ڈھانچہ و ورکنگ نا بابت احوال تننگا۔ بنجائی وزیر اطلاعات و نشریات چوہدری فواد حسین آئی آر ایس ءِ پوسکن آ وڑوڈول آتیا اتنگ نا است خواہی نا درشانی ءِ کرے ، داوخت آ انسٹی ٹیوٹ آف ریجنل سٹڈیز و انٹرنیشنل انسٹی ٹیوٹ آف سٹریٹجک سٹڈیز نا نیام اٹ کمکاری ءِ ودفنگ آ ہیت وگپ مس۔