وزیراعظم عمران خان نا پوسکن آ ہجری سال انا وخت آ کلہو

اسلام آباد۔ 12 ستمبر (اے پی پی) وزیراعظم عمران خان پوسکن آہجری سال انا ایثار و قربانی تیا مبنی حقی کلہو آعمل کننگ نا گرج آ زور شاغسا پارینے کہ نن محدود علاقائی ، جندی و نسلی خار و بے سوب تعصب آتے ہلسا ملک و قوم انا شونداری و شونہالی کن بایدے کاریم کین ، ہندا سیدھا انگا کسر ءِ۔ اوداہیت ءِ ہجری نا پوسکن آ سال 1440ھ /2018ء نا وخت آ قوم انا پن کلہو اٹی پارے۔ وزیراعظم اسلامی سال انا بناء نا بابرکت وخت آپاکستانی قوم و اہل اسلام کن نیک است خواہی نا درشانی ءِ کرسا بارگاہ ایزدی ٹی دعا کرے کہ دا سال امت مسلمہ کن رحمت نا سوب جوڑ مرے۔ اوپارے کہ محرم الحرام نا تُو ءِ اسلام نا بننگ آن مست ہم بے کچ شرف و توقیر دوئی ئس وخت اس کہ اسلام دانا عظمت اٹ پین ودکی کرے۔ وزیراعظم پارے کہ ہجری سال انا بنا سرکار دوعالم حضرت محمد ﷺ و اونا جان نثار صحابہ غاتا مکہ آن مدینہ ہجرت آن مریک ہراتم او اسلام نا مخالف آتا ظلم و بیدادی آن تنک مرسا اللہ تعالیٰ نا حکم اٹ ہجرت نا دا عظیم مثال ءِ پیش کریر ہراٹی انصار و مہاجر آتا نیام اٹ مواخات نا بے مثال رشتہ قائم مس۔ عمران خان پارے کہ دا مبارک انگا تُو اٹی پیش بروک آ دا عظیم واقعہ آن راہشونی ہلسا ننے جوزہ ایثار و قربانی، اخوت و ایلمی، ہمدردی و مذہبی رواداری و صبر و سگ انا پر چار و دا بڑزکو اقدار آ عمل نا گرج مست آن بھاز زیات ءِ۔ اوپارے کہ نن محدود علاقائی، جندی و نسلی خار و بے سوب نا تعصب آتے ہلسا ملک و قوم انا شونداری و شونہالی کن بایدے کاریم کین۔ ہندا سیدھا انگا کسر ءِ ۔ وزیراعظم اللہ تعالیٰ آن دعا کرے کہ او ننے تینا پناہ ٹی تخے و پاکستان ءِ امن ، شونداری و شونہالی آن ہمکنار کے و پوسکن آ ہجری سال انا اصل کلہو ہراکہ ایثار و قربانی آ مبنی ءِ ننا زند اٹی اوار کے۔