صدر مملکت عارف علوی ناپوسکن آ ہجری سال 1440 ھ نا وخت آ کلہو

اسلام آباد۔ 12ستمبر (اے پی پی) صدر مملکت عارف علوی بڑزکو اخلاقی اقدار آ عمل کرسا ہر اعتبار اٹ اسلام نا مطلوب و مقصود راج اس جوڑ کننگ نا گرج ءِ تالان کرسا پارے کہ ساڑی آ جمہوری حکومت ملک و قوم نا شونداری و شونہالی کن سہی سمت اٹی سفر نا بناءِ کرینے و بھا ز زوت نن تینا شونداری نا تخوک آ ہدف آتے دوئی کننگ اٹ سرسہب مرینہ۔ اوداہیت ءِ ہجری نا پوسکن آ سال 1440ھ/2018ء نا وخت قوم انا پن کلہو اٹی پارے ہرا (اینو) چارشنبے آن بناء کننگ ءِ۔ صدر مملکت عارف علوی اسلامی کیلنڈر نا سال 1440ھ نا بنا آ پاکستانی قوم و اہل اسلام کن نیک است خواہی نا درشانی ءِ کرسا پارے کہ اسلامی سال انا اولیکو تُو محرم الحرام ءِ۔ دانا شمار ہموچار مقدس تُو تیٹی مریک ہرافتا ذکر ءِ تعلیمات اسلامی ٹی شرف و توقیر والا تُو تا حیثیت اٹ مسنے ، محرم الحرام بالعموم ننے تینا اسلاف نا قربانی ، صبر وسگ ، استقامت کون آ بڑزکو انسانی اقدار نا پاسداری و خاص کر واقعہ ہجرت نبوی ﷺ آ انصار و مہاجر آتا تین پہ تین مابت و اخوت ، ایلمی ، ہمدردی ، سیوت و سخا نا جوزہ غاتا مون آ دننگ نا یات ترفک ہرا کہ اسہ ہندن ءُ راج اسے نا بنداو ثابت مس ہرا کماحقہ، مثالی و فلاحی ئس۔ اودعا کرے کہ اللہ تعالیٰ ننے غٹ ءِ پوسکن آ ہجری سال انا بناء آ حقی خوشی تیان ہمکنار فرمائفے و محرم الحرام نا تُو انا اہمیت ءِ سہی رداٹ پہہ مننگ نا توفیق عطاء فرمائفے۔