بنجائی وزیر تعلیم شفقت محمود نا نیشنل کمیشن فار ہیومن ڈویلپمنٹ نا دورہ ٹی ہیت وگپ

اسلام آباد۔ 12 ستمبر (اے پی پی) بنجائی وزیر تعلیم شفقت محمود پارینے کہ ساڑی آ حکومت نا غٹ آن بھلا اولیت ملک اٹی خواندگی ءِ ودفنگ و اسکول آتیان پیشن مروک آ 2کروڑ 28 لکھ چناتے اسکول آتے ٹی داخل کننگ نا ءِ ، بنجائی وزارت تعلیم و کسبی تربیت اٹی اسہ جتا ءُ بشخ اس جوڑ کننگک ہرانا زمواری مریک کہ اسکول آتیان پیشن مروک آ چناتے دمدستی وڑاٹ تعلیمی دنگ اٹی اوار کننگ مرے، داننا حکومت نا غٹ آن بھلا اولیت ءِ۔ داخیال آتا درشانی ءِ بنجائی وزیر تعلیم شفقت محمود نیشنل کمیشن فارہیومن ڈویلپمنٹ نا اولیکو دورہ ٹی کرے۔ وزیر تعلیم پارے کہ گدرینگوک آ 70 سال اٹی جتا حکومت آک تعلیم نا اہمیت ءِ گوجالانو ہرانا سوب اینو نن دنیا ٹی غٹ آن کم خوانوک اُن یعنی 58 درسد ہراکہ سگ انا قابل اف۔ اوپارے کہ ساڑی آ حکومت نا غٹ آن بھلا اولیت خلقت ءِ خواندہ جوڑ کننگ نا ءِ تانکہ نن دنیا نا قوم تیٹی اسہ باشرف ءُ ہند اس دوئی کننگ کین۔ بنجائی وزیر داہیت آ است ہسونی نا درشانی ءِ کرے کہ اشرافیہ تینکن کبین ءُ تعلیمی ادارہ جوڑ کرینے وخت اس کہ نیزگار الس سرکاری اسکول آتے ٹی چناتے گدریفنگ آ بیوس ءُ ہراڑے تعلیمی آب بھاز زیات جوان اف۔ اوپارے کہ نن خوانہ کہ سرکاری ادارہ غاتے ٹی خلقت خواری اٹ کاریم کیر تانکہ کس اس بے روزگار سلپ و تعلیمی آب ءِ ودفنگ مرے۔ اوپارے کہ نن ایڈہاک ازم انا برخلاف اُن و خوانہ کہ اسہ جامع ، سہی سمت و اسہ وڑ پالیسی نا رداٹ قومی ادارہ غاتے ٹی کاریم کننگے۔ بنجائی وزیر ءِ اونا اولیکو دورہ نا وخت آ چیئرپرسن این سی ایچ ڈی رازینہ عالم خان ادارہ نا کارکڑد نا بارواٹ بریفنگ تس و پارے کہ داوخت آ 5949 فیڈر اسکول/غیر رسمی تعلیم آ کاریم کننگ ءُ ہراڑے 335,164چناتعلیم حاصل کننگ ءُ۔ ہنداوڑ این سی ایچ ڈی نیشنل ٹریننگ انسٹیٹیوٹ اس جوڑ کرینے ہرا نا مسخت غیر رسمی تعلیم نا بابت تعلیمی مواد تیار کننگ، ملازم آتا کاریم نا کچ و جاست وپاست کرسا غیر رسمی تعلیم ءِ گچین جوڑ کننگ نا ءِ۔ شون ہلوک ملک آتے ٹی تعلیم اسکان رسینگ اسہ اہم ءُ ویل اسے ہراڑے غیر رسمی تعلیم کم خڑچ و سرسہب انگا ءِ۔ این سی ایچ ڈی نا خیال ءِ کہ اگہ پین پروگرام و پالیسی ٹی سنجیدگی و عملدرآمد نا کمتی خننگاکہ۔ این ٹی آئی نا چاہندار آک اسہ نیشنل پلان آف ایکشن (2018ء آن 2023ء ) بنجائی وزارتعلیم و کسبی تربیت نا ماتحت تدوین کرینے ہراٹی غٹ شریدار اوار مسنو دُن کہ حکومتی ادارہ، بین القومی امداد تروک آ ادارہ و غیر سرکاری ادارہ غاک اوار ءُ تانکہ ملک اٹی 100 درسد داخلہ و 90 درسد خواندگی نا کچ انا دوئی ءِ ممکن جوڑ کننگ مرے۔