چیئرمین سینیٹ محمد صادق سنجرانی شہید کرنل سہیل عابد نا اُراغا ہنسا اونا غمزدہ خاہوت تون ہڑزخواہی نا درشانی ءِ کرے

اسلام آباد۔ 24 مئی (اے پی پی)چیئرمین سینیٹ محمد صادق سنجرانی پنچ شنبے نادے شہید کرنل سہیل عابد نا اُراغا ہنا و اونا غمزدہ خاہوت تون ہڑزخواہی کرے۔ چیئرمین سینیٹ پارے کہ پاک فوج انا دہشت گردی نا برخلاف جنگ اٹی قربانی تیا مچ آ قوم فخر کیک و کرنل سہیل عابد شہید کون آ بہادر آتیا مچ آ قوم ءِ ناز ءِ۔ چیئرمین سینیٹ پارے کہ لمہ وطن کن قربانی تروک آتا پن تاریخ اٹ سنہری لوز آتیٹی نوشتہ کننگک۔ کرنل سہیل عابد بلوچستان نا گل زمین آ دہشت گردی نا برخلاف جنگ کرسا تینا جان نا نذرانہ ءِ پیش کرے ہراد ے مدام یات کننگک۔ اوداہیت ءِ واضح کرے کہ دہشت گرد آک پاکستانی قوم و پاکستان نا فوج انا عزم ءِ بدلیفنگ کپسہ۔ لمہ وطن نا دفاع و دہشت گردی و انتہاء پسندی نا چٹفنگ کن حکومت، سیاسی واک آک، پارلیمان و الس پرعزم ءِ۔ چیئرمین سینیٹ ہراکہ سینٹ نا ڈل اتون اوار ئس ہرافتے ٹی سینیٹر ز محمد اعظم خان سواتی، فیصل جاوید، میاں عتیق شیخ و مرزا آفریدی اوار ئسر، شہید کرنل نا روح انا ثواب کن فاتحہ خوانی کرے و غمزدہ خاہوت تون ہڑزخواہی نا درشانی ءِ کرسا اللہ تعالیٰ آن دعا کریر کہ او پدسلوک آتے صبر و حوصلہ ایتے۔ اوپاریر کہ مچ آ قوم ڈکھ انا دا ساہت اٹ غمزدہ خاہوت تون تفوک ءِ۔ چیئرمین سینیٹ شہید کرنل نا خاہوت ءِ تینا پبی کمک نا یخین دہانی ہم کرفے۔