مخالف آتون حق آ مبنی ہچ ئُ گڑاس اف بیرہ مفروضہ ئُ، عدالت و جج آتیا پت انا درشانی ئِ کینہ، عابد شیر علی نا سپریم کورٹ نا پیشن میڈیا تون ہیت وگپ

اسلام آباد۔ 17جولائی (اے پی پی) وزیر مملکت دیر و بجلی عابد شیرعلی پارینے کہ مخالف آتون حق آ مبنی ہچ ئُ گڑاس اف بیرہ مفروضہ ئُ، عدالت و جج آتیا پت انا درشانی ئِ کینہ و انصاف نا اومیت ئِ، عمران نامہ و پرویز مشرف نامہ مستین نا قصہ جوڑ مریرہ، جے آئی ٹی شریف خاہوت نا برخلاف خودساختہ رپورٹ اس جوڑ کرینے، یخین ئِ عدالت انصاف آ مبنی فیصلہ اس ایتک۔ وزیر مملکت دیر و بجلی عابد شیر علی سپریم کورٹ نا پیشن میڈیا تون ہیت وگپ کرسا پارے کہ جے آئی ٹی شریف خاہوت نا برخلاف خودساختہ رپورٹ اس جوڑ کرینے ہراٹی حق ئِ اودیم کننگا و اودے چشوک کننگ نا کوشست کننگا۔ اوپارے کہ ننامخالف آتون حق آ مبنی ہچ ئُ گڑاس اف بیرہ مفروضہ ئُ۔ اوپارے کہ نن عدالت و جج آتیا پت انا درشانی ئِ کینہ و اوفتیان انصاف نا اومیت ئِ ۔ عمران نامہ و پرویز مشرف نامہ مستین نا قصہ جوڑمریرہ۔ اوپارے کہ وزیراعظم نواز شریف نا پن پانامالیکس اٹی پن اولیکو دے آن اف ولے مخالف آتا سازش آتے بے سہب جوڑ کینہ ، دابندغ آک وزیراعظم محمد نواز شریف نا انقلابی گام گیج آتیان خائف ئُ ہراٹی ملک شونداری نا کسرآ روان مننگ ئِ۔ اوشیخ رشید ئِ تنقید نا نشانہ جوڑ کرسا پارے کہ شیخ رشید ہی ئس ہر اوزیراعظم نواز شریف ئِ دنیا نا گچین انگا انسان پاریکہ و اینو اونا برخلاف ئِ، شکر ئِ اوداسہ پارٹی نا بشخ اس اف ورنہ ملک انا حال 1999ءآنبارکریکہ۔