وزیر خزانہ اسحاق ڈار نا واشنگٹن نا دورہ نا ایسری آ پاکستانی صحافی تا رڑتون ہیت وگپ

پاکستان نا معیشت سوگو ئِ، ملک اقتصادی بابت شونداری کننگ ئِ، آئی ایم ایف نا داسہ پین پروگرام تیٹی اوار مفنہ
واشنگٹن۔ 26اپریل (اے پی پی) وزیر خزانہ اسحاق ڈار پارینے کہ پاکستان نا معیشت داسہ سوگو ئِ و شونداری کننگ ئِ، آئی ایم ایف نا داسہ پین پروگرام اٹی اوار مفنہ۔ اوداخیال آتا درشانی ئِ تدوک آ دے داڑے واشنگٹن نا تینا دورہ نا ایسری آ پاکستانی صحافی تا اسہ رڑ اسے تون ہیت وگپ کرسا کرے۔ وزیر خزانہ صحافی تے امریکی کمامدار و جہانی بینک و آئی ایم ایف نا کمامدارآتون تینا اوڑدہی تا بارواٹی پارے وپارے کہ آئی ایم ایف تون پروگرام نا سرسہبی آن پوروی آن پد داسہ پاکستان پین اسے پوسکن ئُ پروگرام اسے ٹی اوار مفک۔ پاکستان پائیدار اصلاحات نا کمک اٹ ہرااقتصادی سوگوی دوئی کرینے اونا جہانی بینک و آئی ایم ایف اعتراف ئِ کرینو۔ اوپارے کہ داسہ ننا معیشت دُوارہ شونداری نا کسر آ پدی ہنانے و اومیت ئِ کہ 30 جون آ چٹوک آ اینخو مالی سال اٹی اقتصادی شونداری نا شرح 5 درسد مریک۔ وزیر خزانہ پارے کہ مالی و اقتصادی سوگوی نا دوئی آن پد حکومت داسہ پاکستان ڈویلپمنٹ فنڈ، پاکستان انفراسٹرکچر بینک اتون اوار چندی ایلو بست و بند آتے کن راجی بشخ آتیا چکار تخانے تانکہ بڑزکو انگا شرح نمو کن سفربرجاسلے۔