وزیراعظم نا سلاہکار خارجہ امور سرتاج عزیز نا اوغان قومی سلامتی نا سلاہکار حنیف اتمار تون ٹیلی فون آ ہیت وگپ

اسلام آباد۔ 17 فروری (اے پی پی) وزیراعظم نا سلاہکار خارجہ امور سرتاج عزیز پارینے کہ جماعت الحرار اوغانستان اٹی تینا رکھوک پناہ گاتیان پاکستان اٹی دہشت گردی و وحشیانہ سرجزآتیٹی اوار ئِ۔ حکومت پاکستان نا کنڈآن وار وار گڑتی و جماعت الحرار نا شکبر دہشت گرد آتا فہرست اوغانستان حکومت ئِ فراوان کننگ نا باوجود اوغانستان دہشت گرد گروپ نا برخلاف ہچ ئُ کارروائی اس کتو۔ دہشت گردی ہڑتوم آ ملک آتے کن اسیجائی خلیس و دانا چٹفنگ کن خڑکی کمکاری و سیم نا ہڑتوم آ کنڈآتا دہشت گرد عنصر آتا ہن و بر ئِ توننگ نا غرض آن موثر بارڈر مینجمنٹ نا گرج ئِ۔ دفترخارجہ نا ترجمان نا رداٹ داہیت ئِ سلاہکار خارجہ پنچ شنبے آ اوغان قومی سلامتی نا سلاہکار حنیف اتمار تون ٹیلی فون آ ہیت وگپ کرسا پارے۔ اوغان قومی سلامتی نا سلاہکار داوخت آ تینا حکومت نا کنڈآن پاکستان اٹی ساڑی دہشت گرد واقعہ ٹی نہادی انسانی جان تا زیان آ ہڑزخواہی نا درشانی ئِ کرے۔