وزیراعظم محمدنواز شریف نا گورنر سندھ محمد زبیر تون ہیت وگپ

کراچی ٹی امن و ایمنی نا حالیت آتیٹی نمان گچینی بس
اسلام آباد۔ 10 فروری (اے پی پی) وزیراعظم محمد نواز شریف پارینے کہ بنجائی حکومت سندھ انا خلقی و شاری ہڑتوم آ علاقہ غاتا شونداری آ چکار تخانے۔ توانائی، انفراسٹرکچر و راجی بشخ آتون اوار سندھ انا الس کن کیہی ڈٹ آتا بناءکننگانے۔ غٹ کڑدہ غاتا تین پہ تین امنائی آن نن کراچی ٹی امن نا اڈتننگ کن گام ہرفین و اللہ نا فضل اٹ امن و ایمنی نا حالیت آتیٹی نمان گچینی بسنے۔ اوداہیت ئِ گورنر سندھ محمد زبیر تون جمعہ آ وزیراعظم ہاﺅس اٹی ہیت وگپ کرسا پارے۔ وزیراعظم پارے کہ بنجائی حکومت پورٹ قاسم پاور پلانٹ ، اینگروتھرپاور پروجیکٹ، جھم پیرونڈ پاور پروجیکٹ و تھرمائن ماﺅتھ اوریکل پروجیکٹ تون اوار سندھ اٹی کیہی توانائی ڈٹ آتیا کاریم کننگ ئِ۔ اویات ترفے کہ گدرینگوک آ ہفتہ او سندھ انا الس نا آسراتی کن کراچی آن حیدرآباد موٹروے نا پورو مروک آ ایم نائن سیکشن نا بنائِ کرے۔ وزیراعظم پارے کہ کراچی سرکلرریلوے ڈٹ ئِ سی پیک اٹی اوار کرینن و گرین لین ماس ٹرانزٹ ڈٹ آ زور و شور اٹ کاریم برجاہ ئِ۔ وزیراعظم پارے کہ بنجائی حکومت نا کنڈآن فور و لیاری ایکسپریس وے ڈٹ اکن کمکاری فراوان کننگ انگ ئِ۔ وزیراعظم پارے کہ گورنر سندھ ئِ بنجائی حکومت و سندھ حکومت نا نیام اٹ کمکار کڑد و پول انا حیثیت اٹ بایدے کاریم کروئی مرے تانکہ شونداری گام گیج آتیا بروخت گچین عملدرآمد مرے۔ گورنر سندھ پت انا درشانی ئِ کننگ آ وزیراعظم نا منت واری ئِ ادا کرسا پارے کہ او سندھ انا الس نا مفاد کن تینا فرض ئِ پورو کیک و بنجائی و صوبائی حکومت نا نیام اٹ رابطہ غاتے پین سوگوی ایتک۔