روس اتون رابطہ غاتا ہیت آک احمقانہ و مخالف آتا جوڑ کروک ئُ، صدر ٹرمپ

واشنگٹن۔ 16 فروری (اے پی پی) امریکی صدر ڈونلڈ ٹرمپ ملک انا انٹیلی جنس ادارہ و میڈیا ئِ اونا ٹیم و روس انا نیام اٹ رابطہ غاتا خبر آتیان پد کڑی تنقید نا نشانہ جوڑ کرینے۔ برطانوی نشریاتی ادارہ نا رداٹ ڈونلڈ ٹرمپ قومی سلامتی نا ادارہ این ایس اے و ایف بی آئی آ دا معلومداریک غیر کانودی وڑاٹ افشا کننگ نا دوبہ عائد کرے۔ صدر ٹرمپ پارے کہ این ایس اے و ایف بی آئی دا تعلقداری تا بابت خبر آتے میڈیا ئِ افشا کرے۔ اوراجی رابطہ غاتا سائٹ ٹوئٹر آ نوشتہ کرینے کہ’معلومداری غیر کانودی وڑاٹ انٹیلی جنس برادری نا کنڈآن نیویارک ٹائمز و واشنگٹن پوسٹ ئِ تننگا۔ ولے داڑتون ہی ارٹ میکو ٹویٹ اٹی او دا احوال آتے احمقانہ گوندا وپارے کہ دا اونا ڈیموکریٹک مخالف آتا جوڑ کروک ئُ۔ اوٹویٹ کرے کہ روس اتون رابطہ غاتا ہیت آک احمقانہ ئُ و دا محض ہیلری کلنٹن نامہم اٹی مروک آ غلطی تے اودیم کننگ کن ئُ۔ امریکی صدر ڈونلڈ ٹرمپ زرہ سے آن پد اسہ پین ٹویٹ اسے ٹی نوشتہ کرے کہ اصل سکینڈل تودادے کہ ملک انا اودیم معلومداری انٹیلی جنس ایجنسی تا کنڈآن مٹھائی آنبار بشخ وپانٹ کننگ انگ ئُ، دا غیر امریکی رویہ اسے۔