ایشیائی شونداری بینک پاکستان ریلوے ٹی 2.5ارب ڈالر نا زرکاری کیک، ادارہ نا ریونیو ودسا 36ارب اسکان رسینگانے
اسلام آباد۔ 07دسمبر (اے پی پی) بنجائی وزیر ریلوے خواجہ سعد رفیق پارینے کہ ایشیائی شونداری بینک پاکستان ریلوے نا مسہ سالہ کارکڑد ئِ مون آ تخسا 2.5ارب ڈالر نا زرکاری کیک، پاکستان ریلوے نا ریونیو 18ارب آن ودسا 30جون 2016ءٹی 36ارب اسکان رسینگانے، اودے اینخو مالی سال انا وخت 40ارب اسکان دروئی ئِ۔ داہیت ئِ او چارشنبے آ”ریلوے ورکشاپ فاردی فارمیشن آف پاکستان ریلویز اسٹریٹجک پلان“ اٹی خیال آتا درشانی ئِ کرسا پارے۔ خواجہ سعد رفیق پارے کہ پاکستان ریلوے اسٹریٹجک پلان نا بابت ایشین ڈویلپمنٹ بینک انا منت وارئِ ہراپاکستان ریلوے ٹی است خواہی نا درشانی ئِ کرے۔ اوپارے کہ غٹ ئِ سمائِ کہ 2013ءآن مست پاکستان ریلوے نا حالیت آک امر ئسر و داسہ انت ئُ۔اوپارے کہ پاکستان ریلوے ئِ دُوارہ تینا نت تیا سلفنگ انگ ئِ و انشاءاللہ ننے اوٹی سرسہبی مریک۔ اوپارے کہ مہالو پاکستان ریلوے ٹی ہچ گہس سفر کننگ کن تیار الوولے داسہ پاکستان ریلوے ٹی سفر کروک آتا کچ15ملین اسکان رسینگانے۔ پاکستان ریلوے نا ریونیو ٹی بھلو ودکی اس مننگ ئِ۔ خواجہ سعد رفیق پارے کہ ادارہ غاتیٹی سیاسی نیام تمنگ آن ادارہ غاک بھس مریرہ، ہنداخاطرآن ننا کوشست ئِ کہ ریلوے تون اوار ہر ادارہ ئِ سیاست نا نظر کننگپ دُن کہ مسکوہی ٹی ایلو سیاسی جماعت آک کرسا کرینو۔ اوپارے کہ ریلوے اسٹیشن آتا کچ اٹی ودکی کننگ انگ ئِ۔ مہالو خلقت آک ریلوے اسٹیشن تیا گھنٹہ غاتا گھنٹہ انتظار کریرہ ولے داسہ پاکستان ریلوے وخت انا پابندی نا لحاظ آن جوان ئِ۔ سی پیک ڈٹ انا رداٹ بڑزکو معیار نا ریلوے ٹریک جوڑکینہ۔ نن ریلوے ئِ ہمو ہند آ دننگ خوانہ کہ ریلوے نا ادارہ پاکستان نا معیشت ئِ سوگو جوڑ کننگ اٹی تینا کڑد ئِ ادا کے۔ بنجائی وزیر پارے کہ ننے مسکوہی نا ردینک آتیان بایدے ہیل کروئی مرے۔ پاکستان ریلوے ئِ پین گچین جوڑ کننگ کن گچین ڈٹ بندی کروئی مریک، داوڑنا ورکشاپ آک ادارہ غاتے سوگو جوڑ کننگ کن المی ئُ۔ اوپارے کہ پاکستان ریلوے نا مسہ سالہ کارکڑد ئِ مون آتخسا ایشیائی شونداری بینک 2.5ارب ڈالر نا زرکاری نا ڈٹ اس جوڑ کرینے ہرانا رداٹ لاہور۔پشاور ٹریک نا رینوویشن و انفراسٹرکچر ہم اوار ئُ۔ اوپارے کہ ٹریکس نا رینوویشن اٹی وخت لگک انتئے کہ داروڈآتیان یکسر جتائُ۔ پاکستان ریلوے نا ریونیو 18ارب روپئی آن ودسا 30جون 2016ءٹی 36ارب روپئی اسکان رسینگانے، اودے اینخو مالی سال انا وخت 40ارب اسکان دروئی ئِ۔ اوکان گڈ میڈیا تون ہیت وگپ کرسا خواجہ سعد رفیق پارے کہ تحریک انصاف نا بیانک گرگٹ آنبار رنگ بدلیفرہ ، بلاول نا ہیت وگپ نا سرپیرمفک ، اِرا مسہ دے اٹی اودے تینا حیثیت نا اندازہ مریک، نن تون تحریک انصاف نا فضول ہیت آتا ہچ ئُ ورندی اس اف۔